സീറോ മലബാർ സഭയിലെ ഓശാന തിരുനാൾ

🌿 *പൗരസ്ത്യ സുറിയാനി പാരമ്പര്യത്തിലെ ഓശാനകളുടെ വലിയ തിരുനാൾ ആരാധനക്രമം* 🌿

ܥܹܐܕܵܐ ܫܒ̣ܝܼܚܵܐ ܕܐܘܿܫܲܥܢܹ̈ܐ

പെസഹായുടെ ത്രിദിനങ്ങളുടെ തിരുക്കർമ്മങ്ങൾ രക്ഷാരഹസ്യങ്ങൾ അരങ്ങേറിയ ഓറശ്ലേമിലെ വിശുദ്ധ സ്ഥലങ്ങളിലെ പള്ളികളോടും സ്ഥലങ്ങളോടും ബന്ധിപ്പിച്ച് തീർത്ഥാടന ശൈലിയിൽ സ്ഥല ആരാധനക്രമമായി (Stational Liturgy) സഭയ്ക്ക് സ്വാതന്ത്യം ലഭിച്ച കാലഘട്ടത്തിൽത്തന്നെ രൂപപ്പെട്ടു. എല്ലാ സഭകളിലും ഓറശ്ലേമിലെ ഈ ആരാധനക്രമത്തിന്റെ സ്വാധീനത്താൽ വിവിധ ആരാധനക്രമങ്ങൾ വികാസം പ്രാപിച്ചു. എല്ലാ സഭകളും വിശുദ്ധനാടിന്റെ ചെറുപതിപ്പായി തങ്ങളുടെ പള്ളി ഘടന ക്രമീകരിച്ചു. അപ്രകാരം സൈത്തുമലയുടെ പ്രതീകമായി പ്രാർത്ഥനാ ഭവനവും (ബേസ് സ്ലോസാ - Beth Slota), ബേസ് അനിയായുടെ പ്രതീകമായി മോണ്ടളവും, ഓറശ്ലേമിന്റെ പ്രതീകമായി ബേമ്മയും, ഗാഗുൽഥായുടെ പ്രതീകമായി ബേമ്മയിലെ പീഠവും, ഖബറിടത്തിന്റെ പ്രതീകമായി ബലിപീഠവും, നമ്മുടെ കർത്താവിന്റെ തിരുശരീരത്തിന്റെ പ്രതീകമായി വി. സ്ലീവായും, അവിടുത്തെ ആത്മാവിന്റെ പ്രതീകമായി വി. സുവിശേഷഗ്രന്ഥവും ആരാധനക്രമത്തിൽ ഇടം നേടി. പീഡാനുഭവ സംഭവങ്ങൾ നടന്ന സ്ഥലത്തോടു ബന്ധപ്പെടുത്തി മാത്രമല്ല അതേ സമയത്തോടും വിശ്വസ്ഥത പുലർത്തിയാണ് ആദിമ കാലഘട്ടം മുതൽക്കേ എല്ലാ സഭാ പാരമ്പര്യങ്ങളിലും വിശുദ്ധവാരം ആചരിച്ചുവരുന്നത്. അങ്ങനെ എല്ലാ സഭകളിലും ചരിത്രസംഭവങ്ങളായ ഓശാനയും അന്ത്യത്താഴവും പീഡാനുഭവവും കുരിശുമരണവും സംസ്കാരവും ഉയിർപ്പും വിശുദ്ധ സ്ഥലങ്ങളോടും (പ്രതീകാത്മകമായി) സമയത്തോടും (യഥാർത്ഥ സമയത്തോട് ചേർന്നുതന്നെ) ബന്ധപ്പെടുത്തി നടത്തുന്ന പതിവുണ്ടായി.

*ഉപവാസത്തിൻ്റെ (നോമ്പിൻ്റെ) ഏഴാം ഞായർ - ഓശാനകളുടെ വലിയ തിരുനാൾ*

ܚܲܕܒ̇ܫܲܒܵܐ ܕܫܲܒ̣ܥܵܐ ܕܨܵܘܡܵܐ

ܥܹܐܕܵܐ ܫܒ̣ܝܼܚܵܐ ܕܐܘܿܫܲܥܢܹ̈ܐ

സ്പെയിനിൽ നിന്നുള്ള തീർത്ഥാടക സന്ന്യാസിനിയായ എജേറിയായുടെ "വിശുദ്ധനാട് യാത്രാവിവരണം "

( _Itinerarium Egeriae_ ) എന്ന ഗ്രന്ഥം നാലാം നൂറ്റാണ്ടിലെ ഓറശ്ലേം പീഡാനുഭവ ആഴ്ചാ കർമ്മങ്ങളെക്കുറിച്ചുള്ള ദൃക്സാക്ഷി വിവരണമാണ്. ഈ ഗന്ഥത്തിലെ 30-31 അധ്യായങ്ങളിലെ വിവരണങ്ങൾ അനുസരിച്ച്, നാലാം നൂറ്റാണ്ടിൽ, നമ്മുടെ കർത്താവിന്റെ ഓറശ്ശേമിലേക്കുള്ള പ്രവേശനത്തെ അനുകരിച്ചുള്ള ഘോഷയാത്ര ഓശാന ദിവസം വൈകുന്നേരം ഓറശ്ശേമിൽ 'ഓശാനാ' വിളികളുടെ മധ്യേ നടന്നിരുന്നു. ഉച്ചകഴിഞ്ഞുള്ള ഈ ആഘോഷം വിവിധ സ്റ്റേഷൻ പള്ളികളിൽ നാല് ആരാധനാ യൂണിറ്റുകൾ ആയാണ് നടത്തിയിരുന്നത്. ഒലിവ് മലയിൽ നിന്ന് നഗരത്തിലൂടെ 'അനസ്താസിസി' ലേക്ക് നീങ്ങുന്ന ഘോഷയാത്രയിൽ ഒലിവ് ചില്ലകൾ അല്ലെങ്കിൽ ഈന്തപ്പന ശാഖകൾ വഹിച്ചുകൊണ്ട് എല്ലാ ആളുകളുടെയും പ്രദക്ഷിണവും നടത്തിയിരുന്നു.

ഓശാന ഞായറാഴ്ച വിവിധ സ്ഥലങ്ങളിലെ ആഘോഷത്തിന്റെ ഓറശ്ലേം സമ്പ്രദായം എദ്ദേസയിലെ സമൂഹത്തിന്റെ സ്വീകാര്യത നേടി. നിസിബിസിലെ മാർ അപ്രേം ഈ ആഘോഷത്തിനായി ഒരു മെട്രിക്കൽ ഹോമിലി (മെമ്ര) രചിച്ചതായി നാം കാണുന്നു. മാർ ബാബായിയുടെ കാതോലിക്കേറ്റിന്റെ കാലം മുതൽ (497-503) കിഴക്കിന്റെ മുഴുവൻ സഭകളും ഓശാന ഞായർ ഒരു സംഘടിതവും ഘടനാപരവുമായ തിരുന്നാളായി ആഘോഷിക്കാൻ തുടങ്ങി. മാർ അബ്ദീശോയുടെ (നാലാം നൂറ്റാണ്ട്) കാറ്റലോഗിൽ ഈ തിരുന്നാളിന്റെ ഉത്ഭവത്തെക്കുറിച്ചുള്ള മഹാനായ ആബട്ട് ബാബായിയുടെ ഒരു കൃതിയെക്കുറിച്ച് സൂചിപ്പിക്കുന്നുണ്ട്. ആബട്ട് ബാബായി ദി ഗ്രേറ്റ് (551-628), ആദിയാബെനിലെ ഹെനാന (ആറാം നൂറ്റാണ്ട്) എന്നിവർ ഈ തിരുന്നാൾ ദിനത്തിന്റെ ആരാധനാക്രമ വ്യാഖ്യാനം നടത്തിയിട്ടുണ്ട്. അജ്ഞാതനായ എഴുത്തുകാരന്റെ (ഒൻപതാം നൂറ്റാണ്ടിലോ പത്താം നൂറ്റാണ്ടിലോ) ആരാധനാക്രമ വ്യാഖ്യാനവും ഈ ആരാധനാ ദിനത്തെക്കുറിച്ചുള്ള വിശദാംശങ്ങൾക്ക് ലഭ്യമായ ഉറവിടമാണ്.

കൽദായരുടെ ഇടയിൽ, ശനിയാഴ്ച സായാഹ്ന സമയത്ത് ഒരു ആരാധനാക്രമ പ്രദക്ഷിണം നടന്നിരുന്നു (എന്നാൽ ഇപ്പോൾ കാണുന്നില്ല, സായാഹ്ന ശുശ്രൂഷയിൽ അതിന്റെ സൂചനകളൊന്നുമില്ല). എന്നാൽ ഈ ഞായറാഴ്ചയിലെ ഓനീസാ ദ് ലെലിയായിൽ ഓശാനയുടെ ഘോഷയാത്രയിൽ പാടാൻ ക്രമീകരിക്കപ്പെട്ട ഗീതങ്ങളുടെ ( _oniyata_ ) ഒരു പരമ്പര തന്നെ ഉണ്ട്.

സീറോ മലബാർ സഭയുടെ നവീകരിക്കപ്പെട്ട ആരാധന ക്രമത്തിൽ ഈ പ്രദക്ഷിണം കുർബാനയുടെ ആരംഭത്തിൽ മർമ്മീസായ്ക്കു ശേഷമാണ് ക്രമീകരിച്ചിരിക്കുന്നത്. കുർബാനയിലെ ഓനീസാ ദ് കങ്കേ എന്ന ഗീതമാണ് പ്രദക്ഷിണത്തിന് ഉപയോഗിക്കേണ്ടത്. എന്നാൽ മറ്റ് ഗീതങ്ങളോ, പള്ളി മുട്ടി തുറക്കുന്ന കർമ്മമോ ആരാധനക്രമ ഉറവിടങ്ങളിൽ ഒന്നും കാണുന്നില്ല.

ആരാധനക്രമ ഗ്രന്ഥങ്ങൾ വ്യക്തമാക്കുന്നതുപോലെ, ഈ ദിവസത്തിന്റെ തലക്കെട്ട് 'നോമ്പിന്റെ ഏഴാം ഞായറാഴ്ച, ഇത് കർത്താവിന്റെ ഓശാനയുടെ തിരുനാളായി ആഘോഷിക്കപ്പെടുന്നു' എന്നാണ്.

ܚܲܕܒ̇ܫܲܒܵܐ ܕܫܲܒ̣ܥܵܐ ܕܨܵܘܡܵܐ

ܥܹܐܕܵܐ ܫܒ̣ܝܼܚܵܐ ܕܐܘܿܫܲܥܢܹ̈ܐ

സുറിയാനി ആരാധനക്രമവും പാരമ്പര്യവും അതിന്റെ ഇരട്ട പ്രാധാന്യത്തോടെ 'ഓശാനെ' (ܐܘܿܫܲܥܢܹ̈ܐ)എന്ന വാക്ക് ഉപയോഗിക്കുന്നു. ഈ വാക്ക് അതിന്റെ ബഹുവചന രൂപത്തിൽ, ആദ്യം, അനുഗ്രഹിക്കപ്പെട്ടതും അലയടിക്കുന്നതുമായ ഈന്തപ്പന അല്ലെങ്കിൽ ഒലിവ് ശാഖകളെ സൂചിപ്പിക്കുന്നു; രണ്ടാമതായി, ജനങ്ങളുടെ അന്നത്തെ നിലവിളികളേയും സൂചിപ്പിക്കുന്നു. ‘ഓശാനെ’ ​​ (ܐܘܿܫܲܥܢܹ̈ܐ)എന്ന സുറിയാനി പദമാണ് ഈ ആഘോഷത്തെ സൂചിപ്പിക്കാൻ ഉപയോഗിക്കുന്നത്. ഈ ആഘോഷം നോമ്പുകാല ഞായറാഴ്ചയുടെയും കർത്താവിന്റെ തിരുനാളിന്റെയും സ്മരണയാണ്. നോമ്പുകാലത്തിന്റെ ഘടനയ്ക്കുള്ളിലെ ഞായറാഴ്ച ആഘോഷത്തിന്റെയും നമ്മുടെ കർത്താവിന്റെ ഓറശ്ലേമിലേക്കുള്ള വിജയകരമായ മിശിയാനിക പ്രവേശനത്തിന്റെ തിരുനാളിന്റെയും സവിശേഷതകൾ ഈ ദിവസം ഉൾക്കൊള്ളുന്നു.

പൗരസ്ത്യ സഭകളിൽ സാധാരണ പോലെ ഈ ആരാധനാദിനവും തലേദിവസം വൈകുന്നേരമാണ് ആരംഭിക്കുന്നത്. ഈ ആരാധനാ ദിനത്തിലെ മൂന്ന് പ്രധാന ആഘോഷങ്ങൾ റംശായും, തുടർന്ന് രാത്രി ജാഗരണവും, ഒടുവിൽ പരി. കുർബാനയും, ഈന്തപ്പന ശാഖകളുടെ / ഒലിവ് ചില്ലകളുടെ ആശീർവ്വാദവും ആണ്. ഓശാന ഞായറാഴ്ചയിലെ റംശാ പരമ്പരാഗത ഞായറാഴ്ച സായാഹ്ന ചടങ്ങുകൾ ഉൾക്കൊള്ളുന്നു. ഈ ദിവസം നമ്മുടെ കർത്താവിന്റെ തിരുനാളായി കണക്കാക്കപ്പെടുന്നുണ്ടെങ്കിലും, ഈ ദിവസത്തെ റംശാ നോമ്പുകാലത്തെ ഞായറാഴ്ചയുടെ ഘടനയെ പിന്തുടരുന്നു. രാജഗീതത്തോടൊപ്പം (ഓനീസാ ദ് വാസാലിക്കേ) പ്രദക്ഷിണവും നടത്തപ്പെടുന്നു. വിവിധ കർമ്മങ്ങളുടെ ഒരു കൂട്ടമാണ് (ലെലിയാ, കാലാ ദ് ശഹ്‌റ, സപ്രാ) രാത്രികാല ജാഗരണം.

ഓശാന ഞായറാഴ്‌ചയുടെ അവസാനത്തെ പ്രധാന ആഘോഷം, തിരുന്നാളിന് പ്രത്യേകമായുള്ള പ്രാർത്ഥനകളും ഗീതങ്ങളും ചേർന്നുള്ള പരി. കുർബാനയുടെ ആഘോഷം, ഓശാനേകളുടെ ആശീർവാദം, 'ഓശാനാ' എന്ന ഉദ്ഘോഷത്തോടെ പള്ളിയിലേക്കുള്ള പ്രദക്ഷിണം എന്നിവ ഉൾക്കൊള്ളുന്നു.

ഞായറാഴ്ച രാവിലെ പള്ളിക്ക് പുറത്ത് (Beth Slota) ആഘോഷം നടക്കുന്നെന്ന് ഹുദ്ര നിർദ്ദേശിക്കുന്നു. റൂബ്രിക്സ് ഇപ്രകാരം വിവരിക്കുന്നു, "രാവിലെ, [...], അവർ തിടുക്കപ്പെട്ട് പള്ളിക്ക് പുറത്തുള്ള ഒരു സ്ഥലത്ത് (ആശ്രമം പോലുള്ളവ) ഒത്തുചേരുന്നു. മെത്രാനും വൈദികരും മ്‌ശംശാനാമാരും തക്‌സയിൽ നൽകിയിരിക്കുന്ന ക്രമപ്രകാരം ആഘോഷം ആരംഭിക്കുന്നു".

പരി. കുർബാനയുടെ ആമുഖ ഭാഗത്ത്, മർമ്മീസായും ഓനീസാ ദ് കങ്കേയും പിന്തുടരുന്ന പ്രാരംഭ "സ്വർഗ്ഗസ്ഥനായ ഞങ്ങളുടെ പിതാവേ..." യ്ക്ക് തൊട്ടുപിന്നാലെയുള, ആദ്യത്തെ സ്ളോസായുടെ അവസാനത്തിൽ ഓശാനേകളുടെ ആശീർവാദം നടത്തുന്നു. മർമ്മീസായുടെ ആലാപനത്തിനിടയിൽ പള്ളിയിലേക്ക് പ്രദക്ഷിണം നടത്തുകയും ഓനീസാ ദ് കങ്കെ എന്ന സ്തുതിഗീതത്തോടെ ബേമ്മയിൽ പ്രവേശിച്ച് സ്ലീവാചുംബനം നടത്തി പരി. കുർബാന ആഘോഷം തുടരുകയും ചെയ്യുന്നു.

മർമീസായ്ക്ക് നിശ്ചയിച്ചിരിക്കുന്ന സങ്കീർത്തനങ്ങൾ മർമ്മീസാ 51-ലെ സങ്കീർത്തനങ്ങളാണ് (സങ്കീ. 141-143), അക്വപ്ത (സങ്കീ. 52:8). ഓനീസാ ദ് കങ്കേയിൽ ഓറശ്ലേമിലേക്ക് രാജാവായ മിശിഹായുടെ പ്രവേശനത്തിന്റെ രഹസ്യത്തെ അനുസ്മരിക്കുന്നു.

ഓശാന ഞായർ ആരാധനക്രമം, രാജാവായ മിശിഹായുടെ ഓറശ്ലേമിലേക്കുള്ള വിജയകരമായ പ്രവേശനത്തിന്റെ സ്മരണയാണ്. ഈ അനുസ്മരണം നമ്മുടെ ഇടയിലുള്ള വിജയിയായ രാജാവിന്റെ സാന്നിധ്യത്തെ പ്രതീകപ്പെടുത്തുന്നു. രക്ഷകനെ കണ്ടുമുട്ടിയതിലുള്ള സന്തോഷത്തിന്റെ പ്രകടനമാണ് ഓശാനയുടെ ഉദ്ഘോഷം. ഓശാനെ എന്ന് വിളിക്കപ്പെടുന്ന ഈന്തപ്പനക്കൊമ്പുകൾ / ഒലിവുശാഖകൾ വഹിച്ചുകൊണ്ടുള്ള പ്രദക്ഷിണവും, മിശിഹാ രാജാവിനെ ലഭിച്ചതിന്റെ സന്തോഷത്തിൽ ഓശാനയുടെ ആർപ്പുവിളിയും, മിശിഹായിലുള്ള സമൂഹത്തിന്റെ വിശ്വാസത്തിന്റെയും അവൻ നമ്മുടെ ഇടയിൽ ഉള്ളതിലുള്ള സന്തോഷത്തിന്റെയും പ്രകടനങ്ങളാണ്. ഈ ദിവസത്തെ ഓശാനയുടെ പ്രകീർത്തനം കർത്താവിന്റെ ഓറശ്ലേമിലേക്കുള്ള പ്രവേശനോത്സവത്തിന്റെ രക്ഷാകരമാനവും നമ്മെ ഓർമ്മിപ്പിക്കുന്നു. കുർബാന സ്വീകരണ ഗാനത്തിൽ നാം പ്രാർത്ഥിക്കുന്നു: "[...]ദാവീദിന്റെ ഭവനത്തിൽ നിന്ന് സ്‌നേഹത്തോടെ വന്ന് നമ്മുടെ വംശത്തെ വീണ്ടെടുത്ത മിശിഹാ വാഴ്ത്തപ്പെട്ടവൻ".

ഓശാനയുടെ തിരുനാളിന് സഭാപരമായ മാനവുമുണ്ട്. മിശിഹാ രാജാവായ ഈശോയുടെ നേതൃത്വത്തിൽ പാപത്തിന്റെ അടിമത്തത്തിൽ നിന്നുള്ള തിരിച്ചുവരവിനെ അനുസ്മരിക്കുന്ന പുതിയ ദൈവജനത്തിന്റെ തിരുനാളാണിത്. മിശിഹായും സീയോനും തമ്മിലുള്ള വിവാഹ ബന്ധത്തിന്റെ സഭാപരമായ പ്രതീകാത്മകത ഈ പെരുന്നാൾ ദിനത്തിലെ പ്രാർത്ഥനകളിൽ വ്യക്തമായി ഉപയോഗിക്കുന്നു.

ഈ തിരുന്നാൾ യുഗാന്ത്യോന്മുഖമായ പെസഹാ ആഘോഷത്തിന്റെ ഒരുതരം പൂർവ്വരൂപം നൽകുന്നു. വിശ്വാസികൾ ഭൂമിയിൽ സുസ്ഥിരമായ ജീവിതം നയിക്കാനും അതേ സമയം തന്നെ നിത്യജീവനിലേക്ക് നയിക്കാനും ഈ ദിവസം പ്രചോദിപ്പിക്കുന്നു. ഈ ദിവസത്തെ ഓനിയാത്ത ദ് മൗതായിൽ നാം പ്രാർത്ഥിക്കുന്നു: "...നമുക്ക് ശാഖകൾക്ക് പകരം നമ്മുടെ അധ്വാനം വഹിക്കാം, ജനക്കൂട്ടത്തോടൊപ്പം അവന്റെ സ്വീകരണത്തിനായി പുറപ്പെടാം, കുട്ടികളോടൊപ്പം പ്രകീർത്തനം ആലപിക്കാം. അങ്ങനെ അവന്റെ സ്വർഗ്ഗീയ ഓറശ്ലേമിലേക്കുള്ള പ്രവേശനത്തിന്റെ ആഘോഷത്തിന് യോഗ്യരാകാം...”

വല്ലയിൽ ഗീവർഗീസ് കശ്ശീശാ 🖋️