സ്വർണ്ണവെള്ളി (അറൂവ്താ ദ് ദഹ്വാ)

പൗരസ്ത്യ സുറിയാനി പാരമ്പര്യത്തിൽ ശ്ലീഹാക്കാലത്തിലെ ആദ്യത്തെ വെള്ളിയാഴ്ച "സ്വർണ്ണവെള്ളി" എന്നറിയപ്പെടുന്നു. നിസിബിസ് വിദ്യാപീഠത്തിലെ മല്പാനായിരുന്ന മാർ ഹ്നാനാ (572 - 610 ) ഈ വെള്ളിയാഴ്ചയുടെ തുടക്കത്തിന് അടിസ്ഥാനമായി കാണിക്കുന്നത് ശ്ലീഹന്മാരുടെ നടപടി 3 : 1-10 ൽ മുടന്തന് സൗഖ്യം ലഭിച്ച സംഭവത്തെയാണ്. കേപ്പായോടും യോഹന്നാനോടും ദൈവാലയ വാതിൽക്കൽ വച്ച് ഒൻപതാം മണിക്കൂറിൽ ഭിക്ഷ യാചിച്ച മുടന്തനോട് ശെമ്ഓൻ കേപ്പാ പറഞ്ഞു "വെള്ളിയോ സ്വർണ്ണമോ എന്റെ പക്കലില്ല; എനിക്കുള്ളത് നിനക്ക് ഞാൻ തരുന്നു, നസ്രായനായ ഈശോ മ്ശീഹായുടെ നാമത്തിൽ എഴുന്നേറ്റ് നടക്കുക".

പന്തേക്കുസ്തേ ദിനത്തിൽ ശ്ലീഹന്മാരുടെ മേൽ റൂഹാ ദ്കുദ്ശാ തമ്പുരാൻ എഴുന്നള്ളി വന്നതിന് ശേഷം നടന്ന ആദ്യത്തെ അത്ഭുതമാകയാൽ ഇത് ശ്ലീഹാക്കാലത്തിലെ ആദ്യത്തെ വെള്ളിയാഴ്ച ആചരിക്കുന്നു.